ក្រសួងសង្គមកិច្ច​ បើកវគ្គផ្សព្វផ្សាយ កាតព្វកិច្ចរបស់វិស័យឯកជនលើច្បាប់ស្តីពីការលើកកម្ពស់សិទ្ធិជនពិការ

AKP ភ្នំពេញ ថ្ងៃទី១៥ ខែសីហា ឆ្នាំ២០២៦--

លោក ជួន ឡេង នាយករងមូលនិធិជនពិការ រួមជាមួយលោក ម៉ែន ស្រ៊ីថាវរ័ត្ន ប្រធានរដ្ឋបាលសិទ្ធិជនពិការ និងលោក ភួង សិទ្ធិ ប្រធានមន្ទីរសង្គមកិច្ច អតីតយុទ្ធជន និងយុវនីតិសម្បទាខេត្តបាត់ដំបង នៅថ្ងៃទី១៤ ខែសីហា ឆ្នាំ២០២៦ បានចូលរួមបើកវគ្គផ្សព្វផ្សាយ ស្តីពីការជំរុញការអនុវត្តន៍កាតព្វកិច្ចរបស់វិស័យឯកជនលើច្បាប់ ស្តីពីកិច្ចការពារ និងលើកកម្ពស់សិទ្ធិជនពិការ ដែលប្រព្រឹត្តទៅនៅសាលប្រជុំមន្ទីរសង្គមកិច្ច អតីតយុទ្ធជន និងយុវនីតិសម្បទាខេត្តបាត់ដំបង។

លោក ជួន ឡេង នាយករងមូលនិធិជនពិការ បានឱ្យដឹងថា គោលបំណងនៃវគ្គផ្សព្វផ្សាយនេះ គឺធ្វើឡើងក្នុងគោលបំណង ណែនាំអំពីការអនុវត្តកាតព្វកិច្ចជ្រើសរើសជនមានពិការភាពចូលបម្រើការងារនៅតាមវិស័យរដ្ឋ និងវិស័យឯកជន ទៅតាមអត្រាកំណត់នៃបទដ្ឋានជាធរមាន ក៏ដូចជាជម្រុញឱ្យភាគីពាក់ព័ន្ធទាំងអស់ចូលរួមផ្សព្វផ្សាយបន្តទៅដល់ស្ថាប័ននានា ឱ្យយកចិត្តទុកដាក់ក្នុងការផ្តល់ឱកាសការងារដោយស្មើភាពដល់ជនមានពិការភាព  ។

ក្នុងវគ្គផ្សព្វផ្សាយនេះមានការចូលរួមពីថ្នាក់ដឹកនាំ និងមន្រ្តីជំនាញមកពី មូលនិធិជនពិការ រដ្ឋបាលសិទ្ធិជនពិការ មន្ទីរសង្គមកិច្ច អតីតយុទ្ធជន និងយុវនីតិសម្បទាខេត្ត មន្ទីរការងារនិងបណ្តាបណ្តាលវិជ្ជាជីវៈខេត្ត សាខាមូលនិធិជនពិការខេត្ត និងតំណាងរោងចក្រ សហគ្រាសវិស័យឯកជន សរុបចំនួន៣៧នាក់  ៕

ដោយ ណយ នឿន (ប្រភព៖ក្រសួងសង្គមកិច្ច)