ENGLISH
FRENCH
中文
ARABAKP ភ្នំពេញ ថ្ងៃទី១៩ ខែសីហា ឆ្នាំ២០២៦ -- កន្លែងទាក់ទាញភ្ញៀវទេសចរដ៏ពេញនិយមជាច្រើននៅលើកោះហ្លរេស ក្នុងខេត្តនូសាតេងហ្ការ៉ាខាងកើត (NTT) របស់ប្រទេសឥណ្ឌូណេស៊ី ត្រូវបានបិទជាបណ្ដោះអាសន្ន បន្ទាប់ពីមានគ្រោះរញ្ជួយដីកម្រិត ៧,៧រ៉ិចទ័រ ដែលបានវាយប្រហារកាលពីពេលថ្មីៗនេះ។
យោងតាមទីភ្នាក់ងារគ្រប់គ្រងគ្រោះមហន្តរាយជាតិឥណ្ឌូNeស៊ី (BNPB) បានឱ្យដឹងថា ទីតាំងដែលត្រូវបានបិទជាបណ្ដោះអាសន្នរួមមាន តំបន់ ហ្កៅ រ៉ាងកូ ក្នុងខេត្តម៉ាងហ្ការ៉ៃខាងលិច ភូមិប្រពៃណី វែ រ៉េបូ ក្នុងខេត្តម៉ាងហ្ការ៉ៃ និងឧទ្យានជាតិ កេលីមូទូ ក្នុងខេត្តអេនដេ។ ការបិទនេះមានគោលបំណងធានាសុវត្ថិភាពភ្ញៀវទេសចរ និងសម្រួលដល់ការត្រួតពិនិត្យ និងជួសជុលហេដ្ឋារចនាសម្ព័ន្ធដែលខូចខាតដោយសារគ្រោះរញ្ជួយដី។
ទន្ទឹមនឹងនេះ ឧទ្យានជាតិកូម៉ូដូ និងកន្លែងទាក់ទាញភ្ញៀវទេសចរជុំវិញតំបន់ឡាប៊ូន បាចូ នៅតែបើកជាធម្មតា ដោយគ្មានឧប្បត្តិហេតុណាមួយដែលប៉ះពាល់ដល់ភ្ញៀវទេសចរត្រូវបានរាយការណ៍នោះទេ។ ការវាយតម្លៃដំបូងរបស់ទីភ្នាក់ងារ BNPB បានរកឃើញការខូចខាតតិចតួចនៅកន្លែងទេសចរណ៍ចំនួនប្រាំបី ខណៈដែលសណ្ឋាគារចំនួន២ និងផ្ទះស្នាក់នៅចំនួន៣ បានរងការខូចខាតធ្ងន់ធ្ងរ។ សណ្ឋាគារចំនួន១០ និងផ្ទះស្នាក់នៅចំនួន៥ ផ្សេងទៀតបានរងការខូចខាតតិចតួច។
គិតត្រឹមថ្ងៃទី១៨ ខែសីហា ទីភ្នាក់ងារ BNPB បានបញ្ជាក់ពីមនុស្សស្លាប់ចំនួន ៦៨នាក់ និងរបួសចំនួន ២១៣នាក់ ខណៈដែលប្រតិបត្តិការស្វែងរក និងការវាយតម្លៃអំពីអ្នកស្លាប់ និងរបួស និងការខូចខាតកំពុងបន្ត។
ទន្ទឹមនឹងនេះ ទីភ្នាក់ងារគ្រប់គ្រងគ្រោះមហន្តរាយក្នុងតំបន់ (BPBD) របស់ខេត្ត NTT បានរាយការណ៍កាលពីថ្ងៃទី១៨ ខែសីហា ថា ផ្ទះជិត ១៩.៣០០ខ្នងបានរងផលប៉ះពាល់ រួមទាំងផ្ទះជិត ៦.៥០០ខ្នងដែលខូចខាតយ៉ាងធ្ងន់ធ្ងរ។ ខេត្តម៉ាងហ្ការ៉ៃខាងកើត គឺជាតំបន់ដែលរងផលប៉ះពាល់ខ្លាំងបំផុត ដោយមានផ្ទះជិត ៧.៥០០ខ្នងត្រូវបានខូចខាត។
ទីភ្នាក់ងារស្វែងរក និងជួយសង្គ្រោះជាតិឥណ្ឌូណេស៊ី (Basarnas) បាននិយាយថា ក្រុមស្វែងរក និងជួយសង្គ្រោះនៅតែត្រៀមខ្លួននៅក្នុងតំបន់ដែលរងផលប៉ះពាល់ ជាពិសេសតំបន់ម៉ាហ្ការ៉ៃខាងកើត តំបន់ម៉ាងហ្ការ៉ៃ និងតំបនណាកេកែវ។
សេវាថែទាំសុខភាពក៏ត្រូវបានពង្រឹងផងដែរ។ ក្រសួងសុខាភិបាលឥណ្ឌូណេស៊ីបានធ្វើឱ្យមជ្ឈមណ្ឌលប្រតិបត្តិការសង្គ្រោះបន្ទាន់សុខភាព (HEOCs) ចំនួន៩ ដំណើរការ ដោយដាក់ពង្រាយក្រុមគ្រប់គ្រងវិបត្តិ ក្រុមវេជ្ជសាស្ត្រសង្គ្រោះបន្ទាន់ និងមន្ទីរពេទ្យទីវាល។ រដ្ឋាភិបាលមានគោលបំណងស្តារសេវាវេជ្ជសាស្ត្រជាមូលដ្ឋាននៅមន្ទីរពេទ្យដែលរងផលប៉ះពាល់ក្នុងរយៈពេលមួយសប្តាហ៍ ដោយផ្តល់អាទិភាពដល់ការថែទាំរបួស សម្ភព កុមារ និងការលាងឈាម៕
ដោយ៖ យា ចិន្ដាខន្ដី (ប្រភព៖ VNA)
