​ ចិន និងឥណ្ឌូណេស៊ី ប្តេជ្ញាពង្រឹងការផ្លាស់ប្តូរ និងកិច្ចសហប្រតិបត្តិការឱ្យកាន់តែស៊ីជម្រៅ

AKP ភ្នំពេញ ថ្ងៃទី២១ ខែកញ្ញា ឆ្នាំ២០២៦ -- លោក ហ្សៅ ឡេជី (Zhao Leji) ប្រធានស្ថាប័ននីតិប្បញ្ញត្តិជាន់ខ្ពស់របស់ប្រទេសចិន បានជួបពិភាក្សាការងារជាមួយ លោក អាហ៍ម៉ាដ មូហ្សានី (Ahmad Muzani) ប្រធានសភាពិគ្រោះយោបល់ប្រជាជន (MPR) របស់ប្រទេសឥណ្ឌូណេស៊ី នៅទីក្រុងប៉េកាំង កាលពីថ្ងៃអាទិត្យ។

លោក ហ្សៅ ប្រធានគណៈកម្មាធិការអចិន្ត្រៃយ៍នៃសភាតំណាងប្រជាជនទូទាំងប្រទេសចិន (NPC) បានមានប្រសាសន៍ថា ប្រទេសចិនមានឆន្ទៈធ្វើការជាមួយប្រទេសឥណ្ឌូណេស៊ី ដើម្បីអនុវត្តន៍តាមការណែនាំជាយុទ្ធសាស្ត្ររបស់ប្រមុខរដ្ឋទាំងពីរ និងជំរុញវឌ្ឍនភាពជាបន្តបន្ទាប់នៃទំនាក់ទំនងមិត្តភាពរវាងប្រទេសទាំងពីរ។

លោក ហ្សៅ បានបន្ថែមថា គណៈកម្មាធិការ NPC របស់ចិនត្រៀមខ្លួនរួចជាស្រេចក្នុងការរក្សាការផ្លាស់ប្តូរយ៉ាងជិតស្និទ្ធជាមួយសភា MPR របស់ឥណ្ឌូណេស៊ី ពង្រីកកិច្ចសហប្រតិបត្តិការ និងការផ្លាស់ប្តូរគ្នាទៅវិញទៅមកពង្រឹងការចែករំលែកបទពិសោធន៍នៃការគ្រប់គ្រងរដ្ឋ និងបម្រើឱ្យកាន់តែប្រសើរឡើងដល់ការអភិវឌ្ឍ និងការស្តារឡើងវិញនៃប្រទេសរៀងៗខ្លួន។

ដោយកត់សម្គាល់ថា ប្រទេសឥណ្ឌូណេស៊ី និងចិនមានទំនាក់ទំនងមិត្តភាពដ៏ស៊ីជម្រៅ លោក មូហ្សានី បានលើកឡើងថា លោកសង្ឃឹមថាតាមរយៈដំណើរទស្សនកិច្ចមកកាន់ប្រទេសចិននេះ កិច្ចសហប្រតិបត្តិការប្រកបដោយមិត្តភាពរវាងស្ថាប័នពាក់ព័ន្ធ និងប្រជាជននៃប្រទេសទាំងពីរនឹងត្រូវបានពង្រឹង ហើយភាពជាដៃគូយុទ្ធសាស្ត្រគ្រប់ជ្រុងជ្រោយរវាងប្រទេសទាំងពីរនឹងត្រូវបានលើកកម្ពស់ជាបន្តបន្ទាប់ទៅកាន់កម្រិតថ្មីមួយទៀត។

លោក មូហ្សានី បានបញ្ជាក់ថា សភា MPR របស់ប្រទេសឥណ្ឌូណេស៊ីមានឆន្ទៈពង្រឹងការផ្លាស់ប្តូរជាមួយគណៈកម្មាធិការ NPC របស់ប្រទេសចិន និងជំរុញកិច្ចសហប្រតិបត្តិការស៊ីជម្រៅ និងមានខ្លឹមសារជាក់ស្តែងរវាងប្រទេសទាំងពីរលើវិស័យផ្សេងៗ៕

ដោយ៖ មូល មិនា (ប្រភព៖ ភីបផលដេលី)