ENGLISH
FRENCH
中文
ARABAKP ភ្នំពេញ ថ្ងៃទី២៥ ខែកញ្ញា ឆ្នាំ២០២៦ -- យោងតាមសេចក្តីថ្លែងការណ៍របស់កងកម្លាំងប្រដាប់អាវុធអេហ្ស៊ីប បានឱ្យដឹងថា រដ្ឋមន្ត្រីការពារជាតិអេហ្ស៊ីប ក្រិក និងស៊ីប បានជួបពិភាក្សាគ្នានៅទីក្រុងគែរ កាលពីថ្ងៃពុធ ដើម្បីពិភាក្សាអំពីការពង្រឹងកិច្ចសហប្រតិបត្តិការផ្នែកយោធា។
លោក អាសរ៉ាហ្វ សាឡេម ហ្សាអឺ (Ashraf Salem Zaher) រដ្ឋមន្ត្រីការពារជាតិ និងផលិតកម្មយោធារបស់អេហ្ស៊ីប បានសង្កត់ធ្ងន់លើសារៈសំខាន់នៃការបន្តសម្របសម្រួលគ្នា ដើម្បីបម្រើដល់ផលប្រយោជន៍រួមរបស់ប្រទេសទាំងបី និងរួមចំណែកដល់សន្តិសុខ និងស្ថិរភាពនៅក្នុងតំបន់មេឌីទែរ៉ាណេខាងកើត។
លោក នីកូស ដេនដាស (Nikos Dendias) រដ្ឋមន្ត្រីការពារជាតិក្រិកបានគូសបញ្ជាក់ពីសារៈសំខាន់នៃកិច្ចប្រជុំនេះក្នុងការកសាងអនាគតដ៏ល្អប្រសើរសម្រាប់កងកម្លាំងប្រដាប់អាវុធនៃប្រទេសទាំងបី និងការគាំទ្រកិច្ចសហប្រតិបត្តិការយោធារួមគ្នា ក្នុងក្របខ័ណ្ឌនៃការគោរពអនុសញ្ញា និងច្បាប់អន្តរជាតិ។
លោក វ៉ាស៊ីលីស ប៉ាល់ម៉ាស់ (Vasilis Palmas) រដ្ឋមន្ត្រីការពារជាតិស៊ីប បានលើកឡើងថា កិច្ចប្រជុំនេះគឺជាការបន្តពីកិច្ចប្រជុំកំពូលត្រីភាគីរវាងមេដឹកនាំនៃប្រទេសទាំងបី ដែលបានធ្វើឡើងនៅទីក្រុងឆ្នេរសមុទ្រAlamein របស់ប្រទេសអេហ្ស៊ីបកាលពីដើមខែនេះ ដោយលោកបានសង្កត់ធ្ងន់លើតម្រូវការសម្រាប់ការសម្របសម្រួលរួមគ្នា ចំពេលដែលមានបញ្ហាប្រឈមនានាក្នុងតំបន់ដែលកំពុងផ្លាស់ប្តូរយ៉ាងឆាប់រហ័ស។
នៅចុងបញ្ចប់នៃកិច្ចប្រជុំត្រីភាគីលើកទី៦ នេះ ភាគីទាំងបីបានចុះហត្ថលេខាលើសេចក្តីថ្លែងការណ៍រួមមួយ ដែលមានគោលបំណងពង្រឹងកិច្ចសហប្រតិបត្តិការផ្នែកការពារជាតិ និងសន្តិសុខ ដោះស្រាយបញ្ហាប្រឈមរួម និងគាំទ្រដល់សន្តិភាព និងស្ថិរភាពនៅក្នុងតំបន់មេឌីទែរ៉ាណេខាងកើត។
ប្រទេសអេហ្ស៊ីប ក្រិក និងស៊ីប រក្សាបាននូវយន្តការកិច្ចសហប្រតិបត្តិការត្រីភាគីមួយ ដែលគ្របដណ្តប់លើវិស័យនយោបាយ សេដ្ឋកិច្ច និងសន្តិសុខ ព្រមទាំងមានការរៀបចំកិច្ចប្រជុំកំពូល និងកិច្ចប្រជុំថ្នាក់រដ្ឋមន្ត្រីជាប្រចាំ៕
ដោយ៖ មូល មិនា (ប្រភព៖ ស៊ីនហួ)
