រដ្ឋបាលខេត្តបន្ទាយមានជ័យ៖ ការពង្រឹងវិជ្ជាជីវៈ និងសីលធម៌គ្រូបង្រៀន គឺជាគ្រឹះមិនអាចខ្វះបានក្នុងការកសាងធនធានមនុស្សប្រកបដោយគុណធម៌ និងចីរភាព

AKP បន្ទាយមានជ័យ ថ្ងៃទី២៨ ខែកញ្ញា ឆ្នាំ២០២៦-- លោក យឹម សំណាង អភិបាលរងខេត្តបន្ទាយមានជ័យ បានគូសបញ្ជាក់ថា គុណភាពនៃការអប់រំមិនអាចពឹងផ្អែកលើហេដ្ឋារចនាសម្ព័ន្ធតែមួយមុខនោះទេ ប៉ុន្តែត្រូវទាមទារជាចាំបាច់នូវគ្រូបង្រៀនដែលមានសមត្ថភាព វិជ្ជាជីវៈ សីលធម៌ និងការប្តេជ្ញាចិត្តខ្ពស់។ ការលើកឡើងនេះ ត្រូវបានធ្វើឡើងក្នុងពិធីបើកសិក្ខាសាលាផ្សព្វផ្សាយព្រះរាជក្រឹត្យស្តីពីលក្ខន្តិកៈនៃអង្គគ្រូបង្រៀន ដល់បុគ្គលិកអប់រំនៅមូលដ្ឋានគ្រឹះស្ថានសិក្សាសាធារណៈ ស្រុកព្រះនេត្រព្រះ នាព្រឹកថ្ងៃចន្ទ ទី២៨ ខែកញ្ញា ឆ្នាំ២០២៦។

សិក្ខាសាលាដ៏មានសារៈសំខាន់នេះរៀបចំឡើងដោយរដ្ឋបាលខេត្តបន្ទាយមានជ័យ ក្រោមវត្តមានដឹកនាំដ៏ខ្ពង់ខ្ពស់របស់លោក យឹម សំណាង អភិបាលរងខេត្ត តំណាងដ៏ខ្ពង់ខ្ពស់របស់ ឯកឧត្តម អ៊ុ រាត្រី អភិបាលខេត្តបន្ទាយមានជ័យ ដោយមានការចូលរួមពីប្រធានអង្គភាពធនធានមនុស្សរដ្ឋបាលខេត្ត អនុប្រធានការិយាល័យបុគ្គលិកមន្ទីរអប់រំ យុវជន និងកីឡាខេត្ត ប្រធានមន្ទីរមុខងារសាធារណៈខេត្ត អភិបាលរងស្រុក ប្រធានការិយាល័យអប់រំស្រុក ព្រមទាំងលោកនាយក នាយិការ និងបុគ្គលិកអប់រំទូទាំងស្រុកព្រះនេត្រព្រះ។

លោក យឹម សំណាង បានលើកឡើងថា គ្រូបង្រៀនគឺជាកម្លាំងស្នូលក្នុងការកសាងធនធានមនុស្ស និងជាអ្នកបណ្តុះបណ្តាលកុមារ និងយុវជនឱ្យក្លាយជាពលរដ្ឋមានចំណេះដឹង សមត្ថភាព សីលធម៌ និងការទទួលខុសត្រូវចំពោះសង្គមជាតិ។ ការស្វែងយល់ច្បាស់ពីព្រះរាជក្រឹត្យស្តីពីលក្ខន្តិកៈនៃអង្គគ្រូបង្រៀន ជួយឱ្យបុគ្គលិកអប់រំអនុវត្តការងារប្រកបដោយវិជ្ជាជីវៈ វិន័យ សីលធម៌ និងការទទួលខុសត្រូវខ្ពស់ ព្រមទាំងជួយលើកកម្ពស់កិត្យានុភាពនៃវិជ្ជាជីវៈគ្រូបង្រៀនក្នុងសង្គម។ អាជ្ញាធរខេត្តបានលើកទឹកចិត្តដល់លោកគ្រូ អ្នកគ្រូ ឱ្យបន្តខិតខំសិក្សាបន្ថែម ផ្លាស់ប្តូរបទពិសោធន៍ និងស្វែងរកវិធីសាស្ត្របង្រៀនថ្មីៗ ដើម្បីឆ្លើយតបនឹងការវិវត្តនៃសង្គមសម័យទំនើប។

អាជ្ញាធរមូលដ្ឋាន និងមន្ត្រីពាក់ព័ន្ធត្រូវបានណែនាំឱ្យបន្តពង្រឹងកិច្ចសហការជិតស្និទ្ធជាមួយវិស័យអប់រំ ដើម្បីរួមគ្នាដោះស្រាយបញ្ហាប្រឈម និងបង្កើតបរិយាកាសអំណោយផលដល់ការសិក្សារបស់សិស្សានុសិស្ស។

ថ្នាក់ដឹកនាំរដ្ឋបាលខេត្តបន្ទាយមានជ័យរំពឹងទុកថា ការផ្សព្វផ្សាយព្រះរាជក្រឹត្យនេះនឹងក្លាយជាកាតាលីករដ៏មានឥទ្ធិពលមួយក្នុងការជំរុញវប្បធម៌ការងារប្រកបដោយស្តង់ដារ ធានាបាននូវប្រសិទ្ធភាពការងារ និងរួមចំណែកយ៉ាងសកម្មដល់ការអភិវឌ្ឍធនធានមនុស្សក្នុងខេត្តបន្ទាយមានជ័យប្រកបដោយចីរភាព៕

ដោយ ឈុន សារ៉ាត