វិទ្យាស្ថាន GATE ទទួលបានផ្លាកសញ្ញា i-Space កម្រិតមាស សម្រាប់ការអភិវឌ្ឍមជ្ឈមណ្ឌលនវានុវត្តន៍

AKP ភ្នំពេញ ថ្ងៃទី០៨ ខែតុលា ឆ្នាំ២០២៦ -- វិទ្យាស្ថានទិន្នន័យខ្នាតធំសម្រាប់សង្គមឆ្លាតវៃ (GATE) នៃសាកលវិទ្យាល័យ St Kliment Ohridski Sofia ត្រូវបានផ្តល់ជូននូវវិញ្ញាបនបត្រកម្រិតមាស i-Space (Gold i-Space Label) ដោយសមាគមអឺរ៉ុបសម្រាប់តម្លៃទិន្នន័យធំ(BDVA) សម្រាប់ការអភិវឌ្ឍមជ្ឈមណ្ឌលនវានុវត្តន៍មួយ។ ក្នុងចំណោមមជ្ឈមណ្ឌល i-Space ចំនួន៣៣ ដែលកំពុងដំណើរការនៅអឺរ៉ុប មានតែ ៥ប៉ុណ្ណោះដែលទទួលបានកម្រិតមាសនេះ។

ការទទួលស្គាល់នេះបានឆ្លុះបញ្ចាំងពីវឌ្ឍនភាពរបស់វិទ្យាស្ថាន GATE ចាប់តាំងពីទទួលបានវិញ្ញាបនបត្រកម្រិតប្រាក់ i-Space កាលពីឆ្នាំ២០២៤។

វិញ្ញាបនបត្រកម្រិតមាសនេះ ជាការបញ្ជាក់ពីសមត្ថភាពរបស់វិទ្យាស្ថានGATE i-Space ក្នុងការគាំទ្រស្ថាប័ន និងក្រុមហ៊ុននានាក្នុងការអភិវឌ្ឍសាកល្បង និងដាក់ឱ្យប្រើប្រាស់នូវដំណោះស្រាយដែលផ្អែកលើទិន្នន័យនិងបច្ចេកវិទ្យាបញ្ញាសិប្បនិម្មិត (AI)។ មជ្ឈមណ្ឌល i-Space របស់សមាគមBDVA គឺជាមជ្ឈមណ្ឌលនវានុវត្តន៍ដែលប្រមូលផ្តុំនូវទិន្នន័យ បច្ចេកវិទ្យាបញ្ញាសិប្បនិម្មិត ហេដ្ឋារចនាសម្ព័ន្ធ និងការគាំទ្រផ្នែកអាជីវកម្ម ដើម្បីជួយស្ថាប័ននានា ជាពិសេសសហគ្រាសធុនតូច និងមធ្យម (SMEs) និងក្រុមហ៊ុនចាប់ផ្តើមអាជីវកម្មថ្មី (start-ups) ក្នុងការសាកល្បង ផ្ទៀងផ្ទាត់ និងដាក់ឱ្យប្រើប្រាស់ដំណោះស្រាយដែលជំរុញដោយទិន្នន័យ។

វិញ្ញាបនបត្រនេះត្រូវបានផ្តល់ជូនក្នុងកម្រិតចំនួន៥ គឺកម្រិតចាប់ផ្តើម(Starter) កម្រិតសំរិទ្ធ (Bronze) កម្រិតប្រាក់ (Silver) កម្រិតមាស (Gold) និងកម្រិតផ្លាទីន (Platinum)។

លោកស្រីសាស្រ្តាចារ្យ ស៊ីលវីយ៉ា អ៊ីលីវ៉ា នាយិកាវិទ្យាស្ថាន GATE បាននិយាយថា «យើងនឹងប្រើប្រាស់សមត្ថភាពនេះដើម្បីជួយស្ថាប័ននានាក្នុងការប្រែក្លាយគំនិត ដែលជំរុញដោយទិន្នន័យ និង AI ទៅជាដំណោះស្រាយដែលមានតម្លៃសង្គម និងសេដ្ឋកិច្ចដែលអាចវាស់វែងបាន»។

តាមរយៈវេទិកាបច្ចេកវិទ្យា មន្ទីរពិសោធន៍ និងភាពជាដៃគូរបស់ខ្លួនវិទ្យាស្ថាននេះផ្តល់សេវាកម្មលើការពិសោធន៍ និងការផ្ទៀងផ្ទាត់ដំណោះស្រាយ ហេដ្ឋារចនាសម្ព័ន្ធទិន្នន័យ និង AI មន្ទីរពិសោធន៍ជាក់ស្តែងនិងបច្ចេកវិទ្យាឌីជីថលភ្លោះ ការបណ្តុះបណ្តាល និងការគាំទ្រពីអ្នកជំនាញព្រមទាំងកិច្ចសហប្រតិបត្តិការនៅអឺរ៉ុប។

សេចក្តីប្រកាសព័ត៌មានបានបញ្ជាក់ថា បទពិសោធន៍របស់វិទ្យាស្ថានGATE ក្នុងវិស័យចល័តភាព ការថែទាំសុខភាព និងការអភិវឌ្ឍទីក្រុង ផ្តល់ជាមូលដ្ឋានគ្រឹះសម្រាប់ការផ្ទេរដំណោះស្រាយដែលអាចអនុវត្តបានទៅកាន់វិស័យផ្សេងៗទៀត៕

ដោយ៖ យា ចិន្ដាខន្ដី (ប្រភព៖ BTA)