ENGLISH
FRENCH
中文
ARABAKP ភ្នំពេញ ថ្ងៃទី១៩ ខែតុលា ឆ្នាំ២០២៦ -- នាយករដ្ឋមន្ត្រីចិន លោក លីឈាង (Li Qiang) បានថ្លែងថា ប្រទេសចិនត្រៀមខ្លួនជាស្រេចដើម្បីពង្រឹងយុទ្ធសាស្ត្រអភិវឌ្ឍន៍ជាមួយប្រទេសអ៊ូសបេគីស្ថាន និងធ្វើឱ្យកិច្ចសហប្រតិបត្តិការកាន់តែស៊ីជម្រៅលើវិស័យថាមពល និងធនធាន បញ្ញាសិប្បនិម្មិត កសិកម្មទំនើប និងវិស័យផ្សេងៗទៀត។
លោក លី ដែលកំពុងបំពេញទស្សនកិច្ចផ្លូវការនៅប្រទេសអាស៊ីកណ្តាលមួយនេះ បានលើកឡើងក្នុងអំឡុងពេលជួបពិភាក្សាការងារជាមួយនាយករដ្ឋមន្ត្រីអ៊ូសបេគីស្ថាន លោក អាប់ឌុលឡា អារីប៉ូវ (Abdulla Aripov)។
លោក លី បានបញ្ជាក់ថា ប្រធានាធិបតីចិន លោក ស៊ី ជីនពីង (Xi Jinping) និងប្រធានាធិបតីអ៊ូសបេគីស្ថាន លោក សាវកាត់ មៀហ្សីយ៉ូយ៉េវ (Shavkat Mirziyoyev) បានជួបគ្នាកាលពីខែសីហា ដោយបានកំណត់ទិសដៅសម្រាប់ការអភិវឌ្ឍទំនាក់ទំនងទ្វេភាគីបន្ថែមទៀត។
ដោយកត់សម្គាល់ថា ឆ្នាំក្រោយនឹងត្រូវជាខួបលើកទី៣៥ នៃទំនាក់ទំនងទ្វេភាគី លោក លី បាននិយាយថា ប្រទេសចិនត្រៀមខ្លួនរួចរាល់ហើយក្នុងការឆ្លៀតឱកាសនេះជាមួយប្រទេសអ៊ូសបេគីស្ថាន ដើម្បីបន្តមិត្តភាពជាប្រពៃណី ពង្រឹងទំនុកចិត្តនយោបាយទៅវិញទៅមក លើកកម្ពស់កិច្ចសហប្រតិបត្តិការជាក់ស្តែង និងជំរុញការកសាងសហគមន៍ចិន-អ៊ូសបេគីស្ថាន ដែលមានអនាគតរួមគ្នា ដើម្បីនាំមកនូវផលប្រយោជន៍កាន់តែច្រើនដល់ប្រជាជននៃប្រទេសទាំងពីរ។
លោក លី បានលើកឡើងថា ប្រទេសចិនត្រៀមខ្លួនធ្វើការជាមួយប្រទេសអ៊ូសបេគីស្ថាន ដើម្បីទាញយកអត្ថប្រយោជន៍បន្ថែមទៀតពីចំណុចខ្លាំងដែលបំពេញឱ្យគ្នាទៅវិញទៅមករវាងសេដ្ឋកិច្ចទាំងពីរ បន្តពង្រឹងការតភ្ជាប់ក្នុងវិស័យហេដ្ឋារចនាសម្ព័ន្ធ ហិរញ្ញវត្ថុ និងវិស័យផ្សេងៗទៀតជំរុញការសាងសង់ប្រកបដោយគុណភាពខ្ពស់នៃផ្លូវដែកចិន-កៀហ្ស៊ីស៊ីស្ថាន-អ៊ូសបេគីស្ថាន និងខិតខំសម្រេចឱ្យបាននូវលទ្ធផលជាក់ស្តែងបន្ថែមទៀត។
លោក អារីប៉ូវ បានលើកឡើងថា ប្រទេសអ៊ូសបេគីស្ថានមានឆន្ទៈធ្វើការជាមួយប្រទេសចិន ដើម្បីជំរុញយ៉ាងពេញលេញនូវការសាងសង់ផ្លូវដែក ចិន-កៀហ្ស៊ីស៊ីស្ថាន-អ៊ូសបេគីស្ថាន និងគម្រោងផ្សេងៗទៀតក្រោមក្របខ័ណ្ឌកិច្ចសហប្រតិបត្តិការ «ខ្សែក្រវាត់ និងផ្លូវ»។ លើសពីនេះ ប្រទេសអ៊ូសបេគីស្ថានចង់ពង្រឹងកិច្ចសហប្រតិបត្តិការដែលផ្តល់ផលប្រយោជន៍ទៅវិញទៅមកក្នុងវិស័យសេដ្ឋកិច្ច ពាណិជ្ជកម្ម និងការវិនិយោគ កសិកម្មថាមពល និងធនធានរ៉ែ គយ ហិរញ្ញវត្ថុ បច្ចេកវិទ្យាឌីជីថល បញ្ញាសិប្បនិម្មិតការការពារបរិស្ថាន និងវិស័យផ្សេងៗទៀត។ ព្រមទាំងពង្រឹងការផ្លាស់ប្តូរក្នុងវិស័យទេសចរណ៍ អប់រំ កិច្ចសហប្រតិបត្តិការរវាងមូលដ្ឋាន និងវិស័យដទៃទៀត លើកកម្ពស់ការសម្របសម្រួលក្នុងក្របខ័ណ្ឌពហុភាគី និងជំរុញការអភិវឌ្ឍជាបន្តបន្ទាប់នៃភាពជាដៃគូយុទ្ធសាស្ត្រគ្រប់ជ្រុងជ្រោយគ្រប់កាលៈទេសៈរវាងអ៊ូសបេគីស្ថាន និងចិន សម្រាប់យុគសម័យថ្មី៕
ដោយ៖ មូល មិនា (ប្រភព៖ ភីបផលដេលី)
