ENGLISH
FRENCH
中文
ARABAKP ភ្នំពេញ ថ្ងៃទី២០ ខែតុលា ឆ្នាំ២០២៦ -- នាយករដ្ឋមន្ត្រីចិន លោក លីឈាង (Li Qiang) បានថ្លែងកាលពីថ្ងៃចន្ទថា ប្រទេសចិនមានឆន្ទៈពង្រីកកិច្ចសហប្រតិបត្តិការជាមួយប្រទេសតាជីគីស្ថាន នៅក្នុងវិស័យឧស្សាហកម្មថ្មីៗ ដូចជាសេដ្ឋកិច្ចឌីជីថល និងបញ្ញាសិប្បនិម្មិត (AI) ជាដើម។
នៅក្នុងជំនួបជាមួយប្រធានាធិបតីតាហ្ស៊ីគីស្ថាន លោក អេម៉ូម៉ាលី រ៉ាម៉ូន(Emomali Rahmon) លោក លី បានលើកឡើងថា ប្រទេសចិនត្រៀមខ្លួនរួចរាល់ក្នុងការបង្កើនពាណិជ្ជកម្មទ្វេភាគីជាមួយតាជីគីស្ថាន ពង្រឹងកិច្ចសហប្រតិបត្តិការលើវិស័យហេដ្ឋារចនាសម្ព័ន្ធ រ៉ែបៃតង ការតភ្ជាប់ និងវិស័យផ្សេងៗទៀត ដើម្បីរួមគ្នាបង្កើតកម្លាំងចលករថ្មីសម្រាប់កំណើនសេដ្ឋកិច្ច។
លោកបានអំពាវនាវឱ្យមានការពង្រឹងកិច្ចសហប្រតិបត្តិការជាមួយតាជីគីស្ថានលើការអនុវត្តច្បាប់ និងសន្តិសុខ ដោយបញ្ជាក់ថា ភាគីទាំងពីរគួរតែពង្រឹងការផ្លាស់ប្តូរព័ត៌មានចារកម្ម និងការចែករំលែកព័ត៌មាន រួមគ្នាប្រយុទ្ធប្រឆាំងនឹងកម្លាំងអាក្រក់ទាំងបី គឺអំពើភេរវកម្ម បំបែករដ្ឋ និងជ្រុលនិយមព្រមទាំងរួមគ្នាការពារសន្តិភាព និងស្ថិរភាពយូរអង្វែងនៅក្នុងតំបន់។
នាយករដ្ឋមន្ត្រីចិនរូបនេះ បានសម្តែងក្តីសង្ឃឹមថា ភាគីតាជីគីស្ថាននឹងបន្តចាត់វិធានការយ៉ាងម៉ឺងម៉ាត់ ដើម្បីធានាសុវត្ថិភាព និងសន្តិសុខសម្រាប់បុគ្គលិក និងសហគ្រាសចិនដែលកំពុងប្រតិបត្តិការនៅក្នុងប្រទេសតាជីគីស្ថាន។
លោក លី បានមកដល់កាលពីថ្ងៃអាទិត្យ ដើម្បីបំពេញទស្សនកិច្ចផ្លូវការនៅប្រទេសតាជីគីស្ថាន និងចូលរួមកិច្ចប្រជុំលើកទី២៥ នៃក្រុមប្រឹក្សាប្រមុខរដ្ឋាភិបាល (នាយករដ្ឋមន្ត្រី) នៃរដ្ឋសមាជិកអង្គការសហប្រតិបត្តិការសៀងហៃ (SCO)។
នៅក្នុងកិច្ចសន្ទនាជាមួយប្រធានាធិបតីតាជីគីស្ថាន លោកបានបញ្ជាក់ថា ប្រទេសចិននឹងគាំទ្រយ៉ាងពេញទំហឹងដល់តាហ្ស៊ីគីស្ថាន ក្នុងការធ្វើជាម្ចាស់ផ្ទះរៀបចំកិច្ចប្រជុំ SCO នេះឱ្យទទួលបានជោគជ័យ ហើយប្រទេសចិនក៏ត្រៀមខ្លួនរួចរាល់ក្នុងការសហការជាមួយគ្រប់ភាគី ដើម្បីជំរុញការអភិវឌ្ឍប្រកបដោយគុណភាពខ្ពស់សម្រាប់អង្គការ SCO ផងដែរ។
លោកបានបន្ថែមថា ប្រទេសចិនក៏មានឆន្ទៈពង្រឹងការទំនាក់ទំនង និងការសម្របសម្រួលជាមួយប្រទេសតាជីគីស្ថាន នៅក្នុងក្របខ័ណ្ឌអង្គការសហប្រជាជាតិ យន្តការចិន-អាស៊ីកណ្តាល និងក្របខ័ណ្ឌពហុភាគីផ្សេងទៀត ព្រមទាំងអនុវត្តយ៉ាងសកម្មនូវគំនិតផ្តួចផ្តើមសកលទាំងបួន ដែលស្នើឡើងដោយប្រធានាធិបតីចិន លោក ស៊ី ជីនពីង (Xi Jinping) និងរួមគ្នាបង្កើតសហគមន៍ដែលមានអនាគតរួមគ្នាសម្រាប់មនុស្សជាតិ៕
ដោយ៖ មូល មិនា (ប្រភព៖ ភីបផលដេលី)
