អភិបាលខេត្តបន្ទាយមានជ័យជំរុញឱ្យរដ្ឋបាលស្រុកព្រះនេត្រព្រះ ប្រើប្រាស់អគាររដ្ឋបាលថ្មីឱ្យចំគោលដៅ ពង្រឹងគុណភាពសេវាសាធារណៈ និងបង្កើនប្រសិទ្ធភាពការងារបម្រើប្រជាពលរដ្ឋ

AKP បន្ទាយមានជ័យ ថ្ងៃទី២៦ ខែតុលា ឆ្នាំ២០២៦--ឯកឧត្តម អ៊ុ រាត្រី អភិបាលនៃគណៈអភិបាលខេត្តបន្ទាយមានជ័យ បានជំរុញឱ្យរដ្ឋបាលស្រុកព្រះនេត្រព្រះបន្តលើកកម្ពស់គុណភាព និងប្រសិទ្ធភាពនៃការផ្តល់សេវារដ្ឋបាល និងសេវាសាធារណៈជូនប្រជាពលរដ្ឋ ព្រមទាំងយកចិត្តទុកដាក់គ្រប់គ្រង ថែទាំ និងប្រើប្រាស់អគាររដ្ឋបាលថ្មី ព្រមទាំងទ្រព្យសម្បត្តិរដ្ឋឱ្យបានត្រឹមត្រូវ ប្រកបដោយតម្លាភាព គណនេយ្យភាព និងប្រសិទ្ធភាពខ្ពស់។ ជាមួយគ្នានេះ មន្ត្រីរាជការគ្រប់រូបត្រូវប្រកាន់ខ្ជាប់វិន័យ និងក្រមសីលធម៌វិជ្ជាជីវៈ បំពេញតួនាទីដោយការទទួលខុសត្រូវ និងចូលរួមពង្រឹងសន្តិសុខ សុវត្ថិភាព និងសណ្តាប់ធ្នាប់សង្គមនៅមូលដ្ឋាន។

ការជំរុញបែបនេះ ត្រូវបានធ្វើឡើងក្នុងឱកាសដែលឯកឧត្តម អ៊ុ រាត្រី អញ្ជើញចូលរួមក្នុងពិធីសម្ពោធដាក់ឱ្យប្រើប្រាស់ជាផ្លូវការអគាររដ្ឋបាលស្រុកព្រះនេត្រព្រះ ក្រោយការសាងសង់បានបញ្ចប់ជាស្ថាពរ នាព្រឹកថ្ងៃទី២៦ ខែតុលា ឆ្នាំ២០២៦ ដោយមានការអញ្ជើញចូលរួមពីឯកឧត្តម ប្លែក វ៉ារី ប្រធានក្រុមប្រឹក្សាខេត្តបន្ទាយមានជ័យ ឯកឧត្តម ខេង ស៊ុម តំណាងរាស្ត្រមណ្ឌលបន្ទាយមានជ័យ ព្រមទាំងថ្នាក់ដឹកនាំខេត្ត មន្ត្រីរាជការ អភិបាលក្រុង-ស្រុក ប្រធានក្រុមប្រឹក្សាក្រុង-ស្រុកទាំង៩ មេឃុំ មេភូមិ និងអ្នកពាក់ព័ន្ធជាច្រើនរូប។

ក្នុងឱកាសនោះ ឯកឧត្តម អ៊ុ រាត្រី បានវាយតម្លៃខ្ពស់ចំពោះកិច្ចខិតខំប្រឹងប្រែងរបស់រដ្ឋបាលក្រុង-ស្រុក ឃុំ-សង្កាត់ ជាពិសេសរដ្ឋបាលស្រុកព្រះនេត្រព្រះ ក្នុងការបំពេញការងារបម្រើប្រជាពលរដ្ឋលើវិស័យផ្តល់សេវារដ្ឋបាល និងសេវាសាធារណៈការរក្សាសន្តិសុខ សុវត្ថិភាព សណ្តាប់ធ្នាប់សង្គម ព្រមទាំងការចូលរួមអភិវឌ្ឍមូលដ្ឋានឱ្យមានការរីកចម្រើន។

ឯកឧត្តមអភិបាលខេត្តបានគូសបញ្ជាក់ថា ការសាងសង់អគាររដ្ឋបាលថ្មីនេះ គឺជាសមិទ្ធផលមួយបន្ថែមទៀតដែលអាចរួមចំណែកសម្រួលដល់ការបំពេញការងាររបស់មន្ត្រីរដ្ឋបាលថ្នាក់ក្រោមជាតិ និង បង្កើតលក្ខខណ្ឌកាន់តែប្រសើរសម្រាប់ការបម្រើសេវាជូនប្រជាពលរដ្ឋ។ ទន្ទឹមនឹងការទទួលបានអគារថ្មី រដ្ឋបាលស្រុកក៏ត្រូវបន្តពង្រឹងគុណភាពការងាររបស់ខ្លួន ដើម្បីឱ្យសមិទ្ធផលហេដ្ឋារចនាសម្ព័ន្ធនេះបម្រើបានតាមគោលបំណង និងផ្តល់ផលប្រយោជន៍ជាក់ស្តែងដល់ប្រជាពលរដ្ឋក្នុងមូលដ្ឋាន។

ឯកឧត្តម អ៊ុ រាត្រី បានណែនាំដល់ថ្នាក់ដឹកនាំរដ្ឋបាលស្រុកឱ្យយកចិត្តទុកដាក់ខ្ពស់ក្នុងការគ្រប់គ្រង ថែទាំ និងរក្សាអគាររដ្ឋបាលថ្មីឱ្យបានគង់វង្ស ព្រមទាំងប្រើប្រាស់ទ្រព្យសម្បត្តិ ថវិកា សម្ភារ និងឧបករណ៍របស់រដ្ឋបាលស្រុកឱ្យបានត្រឹមត្រូវ និងចំគោលដៅ ដោយប្រកាន់ខ្ជាប់នូវគោលការណ៍តម្លាភាព គណនេយ្យភាព និងប្រសិទ្ធភាព។

ការគ្រប់គ្រងទ្រព្យសម្បត្តិសាធារណៈប្រកបដោយការទទួលខុសត្រូវ មិនត្រឹមតែជាកាតព្វកិច្ចរបស់ស្ថាប័នរដ្ឋបាលប៉ុណ្ណោះទេ ប៉ុន្តែថែមទាំងជាកត្តាសំខាន់ក្នុងការធានាឱ្យធនធានរដ្ឋត្រូវបានប្រើប្រាស់ប្រកបដោយប្រសិទ្ធផល និងមាននិរន្តរភាព សម្រាប់បម្រើផលប្រយោជន៍សាធារណៈ។

ជាមួយគ្នានេះ ការកែលម្អសេវាសាធារណៈត្រូវបន្តជាអាទិភាពសំខាន់ ដោយឯកឧត្តមអភិបាលខេត្តបានជំរុញឱ្យរដ្ឋបាលស្រុកព្រះនេត្រព្រះ បន្តលើកកម្ពស់គុណភាព តម្លាភាព គណនេយ្យភាព និងប្រសិទ្ធភាពនៃការផ្តល់សេវាជូនប្រជាពលរដ្ឋ។ មន្ត្រីរាជការគ្រប់រូបត្រូវបង្កើនការខិតខំបំពេញការងារ គោរពវិន័យ និងក្រមសីលធម៌វិជ្ជាជីវៈ ប្រកាន់ខ្ជាប់ភាពថ្លៃថ្នូរ ស្មោះត្រង់ និងការទទួលខុសត្រូវក្នុងការបំពេញតួនាទី ដើម្បីឆ្លើយតបនឹងតម្រូវការរបស់ប្រជាពលរដ្ឋឱ្យបានកាន់តែប្រសើរ។

ក្នុងន័យនេះ ការមានអគាររដ្ឋបាលទំនើប និងសមស្រប គឺជាផ្នែកមួយនៃការកែលម្អលក្ខខណ្ឌការងារ ប៉ុន្តែគុណភាពសេវាសាធារណៈក៏អាស្រ័យលើសមត្ថភាព ក្រមសីលធម៌ និងស្មារតីបម្រើសាធារណៈរបស់មន្ត្រីផងដែរ។ ដូច្នេះ មន្ត្រីគ្រប់រូបត្រូវចាត់ទុកការបម្រើប្រជាពលរដ្ឋជាកាតព្វកិច្ចចម្បង និងខិតខំធ្វើឱ្យការងាររដ្ឋបាលមានភាពងាយស្រួល ច្បាស់លាស់ និងមានប្រសិទ្ធភាព។

លើវិស័យសន្តិសុខ និងសុវត្ថិភាពមូលដ្ឋាន ឯកឧត្តម អ៊ុ រាត្រី ក៏បានណែនាំឱ្យរដ្ឋបាលស្រុក និងអាជ្ញាធរមូលដ្ឋានបន្តយកចិត្តទុកដាក់ជំរុញការអនុវត្តន៍គោលនយោបាយ «ភូមិ-ឃុំ-សង្កាត់មានសុវត្ថិភាព» ទាំង៧ចំណុចរបស់រាជរដ្ឋាភិបាល ឱ្យទទួលបានលទ្ធផលល្អប្រសើរ និងមានប្រសិទ្ធភាព។

ជាមួយគ្នានេះ អាជ្ញាធរ និងសមត្ថកិច្ចពាក់ព័ន្ធត្រូវបង្កើនការយកចិត្តទុកដាក់ក្នុងការប្រយុទ្ធប្រឆាំងនឹងបទល្មើសបច្ចេកវិទ្យា និងបទល្មើសគ្រប់ប្រភេទ គ្រប់ទម្រង់ ព្រមទាំងទប់ស្កាត់អំពើហិង្សា និងខិតខំបោសសម្អាតល្បែងស៊ីសងគ្រប់ប្រភេទចេញពីមូលដ្ឋាន។ ការងារនេះត្រូវអនុវត្តដោយស្មារតីបុរេសកម្ម សកម្ម និងអន្តរសកម្ម សំដៅបង្កើនសមត្ថភាពបង្ការ ទប់ស្កាត់ និងដោះស្រាយបញ្ហាប្រឈមនានាឱ្យបានទាន់ពេលវេលា។

ការពង្រឹងសន្តិសុខ សុវត្ថិភាព និងសណ្តាប់ធ្នាប់សង្គម គឺជាផ្នែកមួយដែលមិនអាចខ្វះបានក្នុងការបង្កើតបរិយាកាសរស់នៅប្រកបដោយសុវត្ថិភាពសម្រាប់ប្រជាពលរដ្ឋ។ ដូច្នេះ ការសហការរវាងអាជ្ញាធរមូលដ្ឋាន សមត្ថកិច្ច និងប្រជាពលរដ្ឋ គឺជាកត្តាសំខាន់ក្នុងការរួមគ្នាទប់ស្កាត់បទល្មើស និងថែរក្សាសុខសុវត្ថិភាពក្នុងសហគមន៍។

សូមបញ្ជាក់ថា អគាររដ្ឋបាលស្រុកព្រះនេត្រព្រះថ្មីនេះ មានទំហំ ៣៦ម៉ែត្រ គុណនឹង ១៤ម៉ែត្រ កម្ពស់៣ជាន់ ដោយចំណាយថវិកាសាងសង់ចំនួន ៣.៧១៦លានរៀល ក្រោមជំនួយឧបត្ថម្ភរបស់រាជរដ្ឋាភិបាលកម្ពុជា។ អគារនេះជាសមិទ្ធផលហេដ្ឋារចនាសម្ព័ន្ធរដ្ឋបាលមួយដែលនឹងរួមចំណែកសម្រួលដល់ការបំពេញការងាររបស់មន្ត្រី និងការផ្តល់សេវាសាធារណៈជូនប្រជាពលរដ្ឋក្នុងស្រុកព្រះនេត្រព្រះ។

ការសម្ពោធដាក់ឱ្យប្រើប្រាស់ជាផ្លូវការនូវអគាររដ្ឋបាលថ្មីនេះ មិនត្រឹមតែបង្ហាញពីការបន្ថែមហេដ្ឋារចនាសម្ព័ន្ធសម្រាប់ការងាររដ្ឋបាលនៅមូលដ្ឋានប៉ុណ្ណោះទេ ប៉ុន្តែថែមទាំងជាឱកាសសម្រាប់រដ្ឋបាលស្រុកព្រះនេត្រព្រះបន្តពង្រឹងការគ្រប់គ្រងផ្ទៃក្នុង លើកកម្ពស់សមត្ថភាពមន្ត្រី និងធ្វើឱ្យការបម្រើសេវាសាធារណៈកាន់តែឆ្លើយតបទៅនឹងតម្រូវការរបស់ប្រជាពលរដ្ឋ ដោយផ្អែកលើគោលការណ៍តម្លាភាព គណនេយ្យភាព ប្រសិទ្ធភាព និងការទទួលខុសត្រូវ៕

ដោយ ឈុន សារ៉ាត