ENGLISH
FRENCH
中文
ARABAKP កំពង់ធំ ថ្ងៃទី២៧ខែតុលាឆ្នាំ២០២៦--ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករង អនុប្រធានប្រចាំការនិងជាប្រធានលេខាធិការដ្ឋានតំណាងឯកឧត្តម នួន ផារ័ត្ន អភិបាលខេត្ត ប្រធានគណៈកម្មាធិការសមាគមអតីតយុទ្ធជននិងនិវត្តជនកម្ពុជាខេត្តកំពង់ធំនាព្រឹកថ្ងៃទី២៧ខែតុលាឆ្នាំ២០២៦បានដឹកនាំសហការី នាំយកស្បៀងអាហារ គ្រឿងឧបភោគបរិភោគនិងគ្រឿងសម្ភារៈ ដែលជាអំណោយដ៏ថ្លៃថ្លារបស់សម្ដេចមហាបវរធិបតី ហ៊ុន ម៉ាណែតនាយករដ្ឋមន្ត្រីនៃព្រះរាជាណាចក្រកម្ពុជា អនុប្រធានទី១សមាគមអតីតយុទ្ធជននិងនិវត្តជនកម្ពុជាទៅប្រគល់ជូននិងដំណើរការសាងសង់ផ្ទះថ្មីជូនដល់ក្រុមគ្រួសារអតីតយុទ្ធជនដែលរងគ្រោះដោយអគ្គីភ័យឆាប់ឆេះផ្ទះអស់គ្មានសល់ ស្ថិតនៅក្នុងភូមិពាមក្រែងឃុំក្ដីដូងស្រុកកំពង់ស្វាយ ខេត្តកំពង់ធំ។
លោក សុទ្ធ ហ៊ន អាយុ ៦១ឆ្នាំបានបញ្ជាក់ថានៅវេលាម៉ោង១៤និង៣០នាទីរសៀល ថ្ងៃទី២៥ខែតុលាឆ្នាំ២០២៦ មានអគ្គីភ័យបានឆាប់ឆេះផ្ទះរបស់គាត់ ដែលសាងសង់អំពីឈើ ជញ្ជាំងនិងដំបូលប្រក់ស័ង្កសីដែលមានទំហំ៦ម៉ែត្រ គុណ៧ម៉ែត្រអស់គ្មានសល់ ដោយសារឆ្លងចរន្តអគ្គិសនី ។
លោក សុទ្ធ ហ៊ន បានបញ្ជាក់ថាបច្ចុប្បន្នគាត់មានសមាជិកគ្រួសារចំនួន៨នាក់មិនមានជម្រកស្នាក់នៅឡើយ ដោយសុំផ្ទះអ្នកជិតខាងដើម្បីស្នាក់នៅបណ្ដោះអាសន្ននឹងបានគោរពសំណូមពរស្នើសុំដល់សម្ដេចតេជោ ហ៊ុន សែន ប្រធានសមាគមអតីតយុទ្ធជន និងនិវត្តជនកម្ពុជា និងសម្ដេចកិត្តិព្រឹទ្ធបណ្ឌិត មេត្តាជួយសាងសង់ផ្ទះថ្មីជូនក្រុមគ្រួសារគាត់បានស្នាក់នៅផងព្រោះក្រុមគ្រួសារគាត់មិនមានលទ្ធភាពដើម្បីសាងសង់ផ្ទះបានទៀតឡើយ ។
ឧត្តមសេនីយ៍ទោ សោម ស៊ុន ក្នុងនាមឯកឧត្តម នួន ផារ័ត្ន ប្រធានសមាគមអតីតយុទ្ធជននិងនិវត្តជនកម្ពុជាខេត្តកំពង់ធំ បានថ្លែងនូវការសោកស្ដាយជាទីបំផុតចំពោះការបាត់បង់ជម្រកស្នាក់នៅរបស់ក្រុមគ្រួសារអតីតយុទ្ធជន ដែលកំពុងមានជីវភាពលំបាកខ្វះខាតនៅពេលនេះនិងបានណែនាំដល់ប្រជាពលរដ្ឋទាំងអស់ ត្រូវតែប្រុងប្រយ័ត្នខ្ពស់ដើម្បីការពារអគ្គីភ័យកុំឱ្យឆាបឆេះផ្ទះដែលបានសាងសង់ឡើងដោយញើសឈាមនិងប្រាក់សន្សំរាប់ឆ្នាំទើបបានផ្ទះមួយខ្នង។ដូច្នេះមុនពេលចេញដំណើរទៅក្រៅផ្ទះត្រូវពន្លត់ភ្លើងធូប ទៀនឬភ្លើងចង្ក្រាននិងបិទប្រព័ន្ធអគ្គិសនីនៅក្នុងផ្ទះឱ្យបានត្រឹមត្រូវ។
នៅក្នុងឱកាសនោះដើម្បីឆ្លើយតបតាមសំណូមពររបស់ក្រុមគ្រួសារអតីតយុទ្ធជន សម្ដេចតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ព្រមទាំងសម្ដេចមហាបវរធិបតី ហ៊ុន ម៉ាណែត និងលោកជំទាវបណ្ឌិត តាមរយៈឯកឧត្តមទេសរដ្ឋមន្ត្រី នាយឧត្តមសេនីយ៍ គន់ គីម អនុប្រធាន និងជាអគ្គលេខាធិការសមាគមអតីតយុទ្ធជន និងនិវត្តជនកម្ពុជា បានសម្រេចឱ្យឧត្តមសេនីយ៍ទោ សោម ស៊ុន អនុប្រធានប្រចាំការ នៃគណៈកម្មាធិការសមាគមអតីតយុទ្ធជននិងនិវត្តជនកម្ពុជាខេត្តកំពង់ធំ តំណាងឯកឧត្តម នួន ផារ័ត្ន ដឹកនាំក្រុមជាងដំណើរការសាងសង់ផ្ទះធ្វើអំពីសសរបេតុង ឆ្អឹងដែក រនាបក្រាលក្តារ ជញ្ជាំងស្មាតប៊ត ដំបូលប្រក់ស័ង្កសីកិនភ្លី ដែលមានទំហំ៧ម៉ែត្រគុណ៥ម៉ែត្រ មានតសំយ៉ាបផ្ទះបាយប្រវែង ៣ម៉ែត្រទៅក្រោយព្រមទាំងមានបង្គន់អនាម័យ១ខ្នងទៀត ជូនអតីតយុទ្ធជន ដែលរងគ្រោះដោយអគ្គីភ័យឆាបឆេះនេះ ជាបន្ទាន់ ដើម្បីឱ្យក្រុមគ្រួសារតីតយុទ្ធជនរបស់យើងបានរស់នៅបានសមរម្យ ។
លោក សុទ្ធ ហ៊ន និងក្រុមគ្រួសារ បានសូមគោរពថ្លែងអំណរគុណដ៏ជ្រៅជាទីបំផុត រកអ្វីប្រៀបផ្ទឹមពុំបាន ចំពោះសម្ដេចតេជោ ហ៊ុន សែន សម្ដេចកិត្តិព្រឹទ្ធបណ្ឌិតនិងសម្ដេចមហាបវរធិបតី ហ៊ុន ម៉ាណែត ដែលបានចាត់តាំងក្រុមការងារសាងសង់ផ្ទះជូនគាត់នៅពេលនេះនិងសូមគោរពជូនពរសម្ដេច លោកជំទាវ ព្រមទាំងថ្នាក់ដឹកនាំសមាគមអតីតយុទ្ធជន និងនិវត្តជនកម្ពុជាខេត្តកំពង់ធំ សូមទទួលបានជ័យជំនះគ្រប់ភារកិច្ច ក្នុងការដឹកនាំនាវាកម្ពុជាក្រោមម្លប់សុខសន្តិភាព និងការអភិវឌ្ឍឱ្យទទួលបានជោគជ័យបន្ថែមទៀត៕
ដោយ៖ស៊ុម វណ្ណា
