មន្ទីរសាធារណការខេត្តបន្ទាយមានជ័យ បន្តជួសជុលផ្លូវជាតិ និងផ្លូវខេត្ត ដើម្បីសម្រួលការធ្វើចរាចរណ៍ដឹកជញ្ជូនកសិផល

AKP បន្ទាយមានជ័យ ថ្ងៃទី២៨ ខែតុលា ឆ្នាំ២០២៦--ការថែទាំ និងជួសជុលផ្លូវថ្នល់ដែលរងការខូចខាតជាបន្តបន្ទាប់ គឺជាកិច្ចការសំខាន់ក្នុងការរក្សាគុណភាពហេដ្ឋារចនាសម្ព័ន្ធដឹកជញ្ជូន និងសម្រួលដល់ការធ្វើដំណើរប្រចាំថ្ងៃរបស់ប្រជាពលរដ្ឋ។ ក្នុងទិសដៅនេះ ក្រុមការងារមន្ទីរសាធារណការ និងដឹកជញ្ជូនខេត្តបន្ទាយមានជ័យ បានបន្តអនុវត្តន៍ការងារជួសជុលផ្លូវជាតិ និងផ្លូវខេត្តដែលរងការខូចខាត ដើម្បីលើកកម្ពស់សុវត្ថិភាព និងភាពងាយស្រួលក្នុងការធ្វើចរាចរណ៍។

លោក សុក ចាន់ថា ប្រធានមន្ទីរសាធារណការ និងដឹកជញ្ជូនខេត្តបន្ទាយមានជ័យ បានឱ្យដឹងថា តាមរបាយការណ៍សកម្មភាពការងារនៅថ្ងៃទី២៧ ខែតុលា ឆ្នាំ២០២៦ ក្រុមការងារបានបន្តជួសជុល និងថែទាំកំណាត់ផ្លូវសំខាន់ៗចំនួន ៥ ខ្សែ ដោយអនុវត្តន៍វិធីសាស្ត្រជួសជុលទៅតាមស្ថានភាពខូចខាតជាក់ស្តែងនៃផ្លូវនីមួយៗ។

  សកម្មភាពទាំងនោះរួមមាន៖ ការបន្តជួសជុលផ្លូវជាតិលេខ៥៦ ចាប់ពីគីឡូម៉ែត្រលេខ ៥០+០០០ ដល់គីឡូម៉ែត្រលេខ ៥១+០០០ ក្នុងស្រុកថ្មពួក ដោយស្រោចកៅស៊ូបាចថ្មលើផ្ទៃផ្លូវប្រេះមួយជាន់។ ការជួសជុលផ្លូវខេត្តលេខ១៥៦D ចាប់ពីគីឡូម៉ែត្រលេខ   ១៧+០០០ ដល់គីឡូម៉ែត្រលេខ ១៨+០០០ ក្នុងស្រុកមង្គលបូរី ដោយប្រើវិធីសាស្ត្រដូចគ្នា ព្រមទាំងសម្អាតរុក្ខជាតិនៅសងខាងផ្លូវ។

ជាមួយគ្នានេះ ក្រុមការងារក៏បានបន្តជួសជុលផ្លូវខេត្តលេខ២៥៨E ចាប់ពីគីឡូម៉ែត្រលេខ ៦+០០០ ដល់គីឡូម៉ែត្រលេខ ៨+០០០ ក្នុងក្រុងប៉ោយប៉ែត និងផ្លូវខេត្តលេខ២៥៦៣A ចាប់ពីគីឡូម៉ែត្រលេខ ៤+០០០ ដល់គីឡូម៉ែត្រលេខ ៦+០០០ ក្នុងស្រុកថ្មពួក ដោយអនុវត្តន៍ការកៀរកិន និងបង្ហាប់ផ្ទៃផ្លូវ។ ចំណែកផ្លូវខេត្តលេខ២៥៦៣ ចាប់ពីគីឡូម៉ែត្រលេខ ០+០០០ ដល់គីឡូម៉ែត្រលេខ ១០+០០០ ក្នុងស្រុកថ្មពួក ក្រុមការងារបានបន្តលុបសំបុកមាន់ និងស្រោចកៅស៊ូបាចថ្មលើផ្ទៃផ្លូវប្រេះមួយជាន់ ដើម្បីកែលម្អស្ថានភាពផ្លូវដែលរងការខូចខាត។

ក្រៅពីការងារជួសជុលតាមកំណាត់ផ្លូវខាងលើ លោកប្រធានមន្ទីរក៏បានបញ្ជាក់ថា មន្ទីរបានយកចិត្តទុកដាក់លើការស្តារកំណាត់ផ្លូវខេត្តដែលរងការខូចខាតដោយសារជំនន់ទឹកភ្លៀងកន្លងមក ដើម្បីសម្រួលដល់ការធ្វើចរាចរណ៍ និងការដឹកជញ្ជូនកសិផលរបស់ប្រជាពលរដ្ឋឱ្យមានភាពងាយស្រួលឡើងវិញ។

ការស្តារផ្លូវដែលរងការខូចខាត មិនត្រឹមតែជាការកែលម្អស្ថានភាពផ្លូវប៉ុណ្ណោះទេ ប៉ុន្តែថែមទាំងមានសារៈសំខាន់ចំពោះការតភ្ជាប់ការធ្វើដំណើររវាងមូលដ្ឋាន ការដឹកជញ្ជូនផលិតផលកសិកម្មទៅកាន់ទីផ្សារ និងការកាត់បន្ថយឧបសគ្គក្នុងជីវភាពប្រចាំថ្ងៃរបស់ប្រជាពលរដ្ឋ។ ទន្ទឹមនឹងនេះ ការថែទាំផ្លូវឱ្យបានទៀងទាត់ ក៏ជាកត្តាមួយដែលរួមចំណែកដល់ការរក្សាគុណភាពផ្លូវ និងការប្រើប្រាស់ហេដ្ឋារចនាសម្ព័ន្ធដឹកជញ្ជូនឱ្យបានយូរអង្វែង។

ជាមួយគ្នានេះ លោក សុក ចាន់ថា បានអំពាវនាវដល់អ្នកប្រើប្រាស់ផ្លូវទាំងអស់ឱ្យគោរពច្បាប់ចរាចរណ៍ផ្លូវគោកឱ្យបានខ្ជាប់ខ្ជួន បើកបរដោយប្រុងប្រយ័ត្ន និងចូលរួមបង្ការគ្រោះថ្នាក់ចរាចរណ៍ ដើម្បីការពារអាយុជីវិតខ្លួនឯង អ្នករួមដំណើរ និងអ្នកប្រើប្រាស់ផ្លូវដទៃទៀត។

សកម្មភាពជួសជុល និងស្តារផ្លូវទាំងនេះ គឺជាផ្នែកមួយនៃការថែរក្សាហេដ្ឋារចនាសម្ព័ន្ធដឹកជញ្ជូនក្នុងខេត្តបន្ទាយមានជ័យ ដោយផ្តោតលើការកែលម្អស្ថានភាពផ្លូវដែលខូចខាត និងសម្រួលដល់ការធ្វើដំណើររបស់ប្រជាពលរដ្ឋឱ្យកាន់តែមានភាពងាយស្រួល និងសុវត្ថិភាព៕

ដោយ ឈុន សារ៉ាត