ប្រជាពលរដ្ឋចំនួន ០៥គ្រួសារ ដែលរងគ្រោះដោយសារការបាក់ស្រុតច្រាំងទន្លេ ត្រូវរុះរើផ្ទះសម្បែង ទទួលអំណោយមនុស្សធម៌

AKP កំពង់ចាម ថ្ងៃ២៨ ខែតុលា ឆ្នាំ២០២៦ —  ប្រជាពលរដ្ឋចំនួន ០៥គ្រួសារ ដែលរងគ្រោះដោយសារការបាក់ស្រុតនៃច្រាំងទន្លេ ព្រមទាំងត្រូវរុះរើផ្ទះសម្បែង ក្នុងឃុំកោះអណ្តែត ស្រុកស្រីសន្ធរ ខេត្តកំពង់ចាម ទទួលបានអំណោយរបស់ឯកឧត្តម លូ គឹមឈន់ ប្រធានក្រុមការងារចុះមូលដ្ឋានស្រុក ដើម្បីជួយសម្រាលការលំបាក និងចូលរួមដោះស្រាយតម្រូវការចាំបាច់ក្នុងជីវភាពរស់នៅប្រចាំថ្ងៃរបស់បងប្អូននាព្រឹកថ្ងៃទី២៨ ខែតុលា ឆ្នាំ២០២៦ នេះ តាមរយៈលោក ប៊ិន ឡាដា អភិបាលនៃគណៈស្រុកស្រីសន្ធរ ។

ក្នុងឱកាសជួបសំណេះសំណាលជាមួយគ្រួសាររងគ្រោះ លោក ប៊ិន ឡាដា អភិបាលស្រុក បានពាំនាំនូវប្រសាសន៍សួរសុខទុក្ខពីសំណាក់ឯកឧត្តម អ៊ុន ចាន់ដា អភិបាលនៃគណៈអភិបាលខេត្តកំពង់ចាម និងឯកឧត្តម លូ គឹមឈន់ ចំពោះបងប្អូនប្រជាពលរដ្ឋ ដែលរងគ្រោះ និងបានចូលរួមសម្តែងនូវការអាណិតអាសូរចំពោះការលំបាកដែលបងប្អូនកំពុងជួបប្រទះ ព្រមទាំងផ្តាំផ្ញើឱ្យបងប្អូនទាំងអស់យកចិត្តទុកដាក់ថែរក្សាសុខភាព និងសុវត្ថិភាពផ្ទាល់ខ្លួន ពិសេសត្រូវមានការប្រុងប្រយ័ត្នខ្ពស់ចំពោះហានិភ័យនៃគ្រោះមហន្តរាយផ្សេងៗដោយគ្រោះធម្មជាតិ ពិសេសចំពោះការបាក់ស្រុតច្រាំងទន្លេបន្ថែមទៀត ដោយបងប្អូនត្រូវមានការប្រុងប្រយ័ត្នខ្ពស់បំផុត។

លោកអភិបាលស្រុក បានណែនាំដល់អាជ្ញាធរមូលដ្ឋានឱ្យបន្តយកចិត្តទុកដាក់តាមដានស្ថានភាពជាក់ស្តែងលើតំបន់ហានិភ័យដែលងាយរងគ្រោះ ព្រមទាំងស្វែងរកដំណោះស្រាយសមស្របណាមួយជូនប្រជាពលរដ្ឋដែលរងផលប៉ះពាល់។

ចំពោះអំណោយនេះ ជាអំណោយរបស់ឯកឧត្តម លូ គឹមឈន់ ប្រធានក្រុមការងារចុះមូលដ្ឋានស្រុក ផ្តល់តាមរយៈរដ្ឋបាលស្រុក ប្រគល់ជូនក្នុងមួយគ្រួសារ រួមមាន អង្ករ ៥០គីឡូក្រាម មី ០១កេស ត្រីខកំប៉ុង ០១យួរ ទឹកត្រី ០១យួរ ទឹកស៊ីអ៊ីវ ០១យួរ ទឹកសុទ្ធ ០១យួរ ទឹកក្រូច ០១យួរ ថវិកា ៤០០.០០០រៀល រួមនឹងសម្ភារផ្ទះបាយចំនួន ០១ •សម្រាប់ផងដែរ៕

ដោយ៖ ឆាយ ម៉ុត