អង្គភាពប្រឆាំងអំពើពុករលួយ៖ ការដាក់ពាក្យប្រឡងជ្រើសរើសមេធាវីជំនាន់ទី២១ រកឃើញឯកសារមិនប្រក្រតីចំនួន ១១ករណី និងក្នុងចំណោមនេះមាន ៥នាក់ប្រើឯកសារក្លែងក្លាយ

AKP ភ្នំពេញ ថ្ងៃ២៨ ខែតុលា ឆ្នាំ២០២៦ —  អង្គភាពប្រឆាំងអំពើពុករលួយ (អ.ប.ព) ឬហៅថា ACU បានឱ្យដឹងថា តាមរយៈការចូលរួមសង្កេតការណ៍ចាប់ពីដំណាក់កាលដាក់ពាក្យប្រឡងជ្រើសរើសមេធាវីជំនាន់ទី២១ នោះឃើញថា មានឯកសារមិនប្រក្រតីចំនួន ១១ករណី និងបេក្ខជនចំនួន ៥នាក់បានប្រើប្រាស់ឯកសារក្លែងក្លាយ។

គួរបញ្ជាក់ថា ការបញ្ចេញឱ្យដឹងពីសំណាក់អង្គភាពប្រឆាំងអំពើពុករលួយនេះធ្វើឡើងក្នុងកិច្ចប្រជុំប្រឹក្សាជាតិប្រឆាំងអំពើពុករលួយ នារសៀលថ្ងៃទី២៨ ខែតុលា ឆ្នាំ២០២៦ នេះ។

អង្គភាពប្រឆាំងអំពើពុករលួយបានឱ្យដឹងថា ក្នុងការដាក់ពាក្យប្រឡងជ្រើសរើសមេធាវីជំនាន់ទី២១ នេះ មានបេក្ខជនបានដាក់ពាក្យចំនួន ៧៣៦នាក់ លើចំនួនពាក្យដែលបានលក់ចំនួនសរុប ៨១៦ច្បាប់ ក្នុងនោះក្រុមស៊ើបអង្កេតពិសេស បានរកឃើញឯកសារមិនប្រក្រតីចំនួន ១១ករណី សរុបជាលទ្ធផលមានបេក្ខជនដាក់ពាក្យ ៥រូប ប្រើឯកសារក្លែងក្លាយ។ក្នុងចំណោមបេក្ខជនទាំង ៥នាក់នេះដែរ កំពុងស្ថិតក្នុងនីតិវិធីកសាងសំណុំរឿងបញ្ជូនទៅតុលាការ។

ប្រភពខាងលើដដែលនេះបានឱ្យដឹងផងថា ក្នុងចំណោមការប្រើឯកសារក្លែងក្លាយនេះមានបេក្ខជន ១រូប មានសញ្ញាបត្រមធ្យមសិក្សាទុតិយភូមិ ឬហៅថាបាក់ឌុប ឆ្នាំ២០០៩ ហើយកែឈ្មោះ កែឆ្នាំកំណើតដោយខ្លួនឯង ហើយដល់ឆ្នាំ២០១៩ ទើបដាក់ពាក្យទៅតុលាការសុំកែឈ្មោះ ខែឆ្នាំកំណើត។ ក្រៅពីនេះ ក៏មានបេក្ខជន ២នាក់ទៀតមានសញ្ញាបត្របាក់ឌុប តែគ្មានឯកសារគល់បញ្ជីនៅក្រសួងអប់រំ យុវជន និងកីឡា តែ អ.ប.ព. ស្រាវជ្រាវដល់ខេត្ត បានរកឃើញបេក្ខជន ២រូបនោះ ពិតជាបានប្រឡងជាប់បាក់ឌុបមែន។

ទាក់ទិនទៅនឹងការពិនិត្យតាមដានបេក្ខជនប្រើប្រាស់ឯកសារក្លែងក្លាយនេះដែរ អង្គភាពប្រឆាំងអំពើពុករលួយក៏បានឱ្យដឹងផងដែរថា មានបេក្ខជន ១រូប មិនព្រមចូលមកបំភ្លឺនៅអង្គភាពប្រឆាំងអំពើពុករលួយតាមការកោះហៅទេ។ចំណែកសញ្ញាបត្របាក់ឌុបបេក្ខជន ១នាក់ទៀត កំពុងបន្តស្រាវជ្រាវ។

សូមបញ្ជាក់ថា ក្នុងកិច្ចប្រជុំក្រុមប្រឹក្សាជាតិប្រឆាំងអំពើពុករលួយ (ក.ជ.ប.ព.) លើកទី១៥ អាណត្តិទី៤ ដែលបានដំណើរការក្រោមអធិបតីភាពដ៏ខ្ពង់ខ្ពស់របស់ សម្ដេចកិត្តិសង្គហបណ្ឌិត ម៉ែន សំអន ប្រធាន ក.ជ.ប.ព.នេះគឺដើម្បី៖ ទី១ ឆ្លងកំណត់ហេតុកិច្ចប្រជុំលើកទី១៤ អាណត្តិទី៤ ទី២ របាយការណ៍របស់អង្គភាពប្រឆាំងអំពើពុករលួយ (អ.ប.ព.) និងទី៣ បញ្ហាផ្សេងៗទៀត៕

ដោយ៖ មករា