ទូតកម្ពុជានៅកូរ៉េ ជួបពិភាក្សាការងារជាមួយលោកសាកលវិទ្យាធិការនៃសាកលវិទ្យាល័យ Dongguk University ប្រទេសកូរ៉េ

AKP ភ្នំពេញ ថ្ងៃទី២៩ ខែតុលា ឆ្នាំ២០២៦--ឯកឧត្តម ឃួន ផុនរតនៈ ឯកអគ្គរាជទូតកម្ពុជាប្រចាំសាធារណរដ្ឋកូរ៉េ បានអញ្ជើញជួបពិភាក្សាការងារជាមួយលោក Yun Jae-woong សាកលវិទ្យាធិការនៃសាកលវិទ្យាល័យ Dongguk University នៅសាកលវិទ្យាល័យ Dongguk ក្នុងទីក្រុងសេអ៊ូល សាធារណរដ្ឋ​កូរ៉េ។

ក្នុងឱកាសនៃជំនួប កាលពីថ្ងៃអង្គារ ទី២៧ ខែតុលា ឆ្នាំ២០២៦ឯកឧត្តមឯកអគ្គរាជទូត បានអបអរសាទរចំពោះសមិទ្ធិផលថ្មីៗនៃគណៈគ្រប់គ្រងសាកលវិទ្យាល័យ​ ដែលទើបសម្រេចបានក្នុងដំណើរទស្សនកិច្ចទៅកម្ពុជាកាលពីខែកញ្ញាកន្លងទៅ ពោលគឺការចុះអនុ​ស្សរណៈនៃការយោគយល់គ្នាជាមួយអគ្គលេ​ខាធិការដ្ឋាននៃគណៈកម្មាធិការជាតិសុវត្ថិភាពចរាចរណ៍ផ្លូវគោក លើគម្រោង «ការលើកកម្ពស់ចំណេះដឹងសុវត្ថិភាពចរាចរណ៍ដល់កុមារ និងការបង្កើតសួនសុវត្ថិភាពចរាចរណ៍ផ្លូវគោក ដែលមិនប៉ះពាល់បរិស្ថាន ដោយប្រើបញ្ញាសិប្បនិម្មិត (AI)» ដោយឯកឧត្តម បានលើកឡើងថាគម្រោងនេះពិតជាមានសារៈសំខាន់ និងចាំបាច់សម្រាប់កម្ពុជាក្នុងការជួយកាត់បន្ថយបញ្ហាគ្រោះថ្នាក់ចរាចរណ៍ ហើយវាក៏ជាគម្រោងមួយដែលអាចជំរុញដល់កិច្ចសហប្រតិបត្តិការលើវិស័យអប់រំរវាងកម្ពុជា និងសាកលវិទ្យាល័យ Dongguk ផងដែរ។

លោកសាកលវិទ្យាធិការ Yun បានមានប្រសាសន៍ថា សាកលវិទ្យាល័យ Dongguk ជាសាកលវិទ្យាល័យព្រះពុទ្ធសាសនា ហើយក៏ចង់បង្កើនកិច្ចសហការជាមួយបណ្តាប្រទេសកាន់ព្រះពុទ្ធសាសនាក្នុងតំបន់អាស៊ីអាគ្នេយ៍ ពិសេសប្រទេសកម្ពុជា។

លោកសង្ឃឹមថានឹងអាចមានគម្រោងសហប្រតិបត្តិការបន្ថែមផ្សេងទៀតជាមួយប្រទេសកម្ពុជា៕

អ៊ាង ប៊ុនរិទ្ធ