ឯកឧត្តម អ៊ុន ចាន់ដា ចុះពិនិត្យសំណង់ទ្វារទឹក ការដាំដើមឈើ និងការបំពាក់បង្គោលភ្លើងសូឡា នៅទំនប់ជ្រោយចេក

AKP កំពង់ចាមថ្ងៃទី ២៩ តុលា ឆ្នាំ២០២៦– ឯកឧត្តម អ៊ុន ចាន់ដា អភិបាល នៃគណៈអភិបាលខេត្តកំពង់ចាម បានដឹកនាំក្រុមការងារ មន្ត្រីជំនាញ និងអាជ្ញាធរពាក់ព័ន្ធ ចុះពិនិត្យស្ថានភាពសំណង់ទ្វារទឹក ដើម្បីពិនិត្យការស្តុបទឹកទុក ការដាំដើមឈើ និងការដាំបង្គោលភ្លើងសូឡា លើតំបន់ទំនប់ជ្រោយចេក ស្ថិតក្នុងឃុំទ្រាន និងឃុំស្រក ស្រុកកំពង់សៀម។

នៅថ្ងៃទី២៩ ខែតុលា ឆ្នាំ ២០២៦នេះ ក្នុងឱកាសអញ្ជើញចុះពិនិត្យ ឯកឧត្តម អ៊ុន ចាន់ដា អភិបាលខេត្តកំពង់ចាម បានធ្វើការណែនាំដល់មន្ត្រីជំនាញត្រូវតាមដានស្ថានភាពទឹកក្នុងតំបន់អាងទំនប់ ព្រោះទំនប់ជ្រោយចេកនេះគឺ គឺជាតំបន់អាងទឹកដ៏ធំសម្រាប់ស្តុបទឹកទុក។ ជាប្រភពទឹកដ៏មានសារៈសំខាន់ សម្រាប់បម្រើដល់វិស័យកសិកម្ម ការស្រោចស្រពដំណាំ និងការប្រើប្រាស់ទឹកក្នុងជីវភាពប្រចាំថ្ងៃរបស់ប្រជាពលរដ្ឋ។ ទំនប់នេះបានចូលរួមចំណែក យ៉ាងសំខាន់ក្នុងការរក្សាតុល្យភាព ប្រភពធនធានទឹក គាំទ្រដល់ការអភិវឌ្ឍវិស័យកសិកម្មប្រកបដោយចីរភាព។

ឯកឧត្តមអភិបាលខេត្តក៏បានបញ្ជាក់ថា ទំនប់ជ្រោយចេក ក៏ជារមណីយដ្ឋានទេសចរណ៍ធម្មជាតិ ដ៏មានសក្តានុពល ក្នុងការស្រូបយកភ្ញៀវទេសចរណ៍ជាតិនិងអន្តរជាតិមក លំហែរកម្សាន្ត ដោយទំនប់ជ្រោយចេកមានទេសភាពធម្មជាតិដ៏ស្រស់ស្អាត ជាមួយនឹងផ្ទៃទឹកដ៏ធំល្វឹងល្វើយ ខ្យល់អាកាសបរិសុទ្ធ និងបរិយាកាស ទេសភាពដ៏ស្រស់បំព្រង ជាតំបន់អេកូទេសចរណ៍ធម្មជាតិ និងជាកន្លែងកម្សាន្តសម្រាប់ប្រជាពលរដ្ឋ និងភ្ញៀវទេសចរ ជាកន្លែងបង្កើតឱកាសការងារ បង្កើនប្រាក់ចំណូល និងជំរុញសេដ្ឋកិច្ចមូលដ្ឋាន ដល់ប្រជាពលរដ្ឋរស់នៅតំបន់នេះកាន់តែប្រសើរឡើងផងដែរ។

បើតាម ការបញ្ជាក់ របស់លោក អ៊ុម វិបុល ប្រធានមន្ទីរធនធានទឹក និងឧតុនិយមខេត្ត បាន ឲ្យដឹងថា ប្រព័ន្ធធារាសាស្ត្រ ទំនប់ជ្រោយចេក ស្ថិតនៅឃុំទ្រាន និងឃុំស្រក ស្រុកកំពង់សៀម ខេត្តកំពង់ចាមនេះ មានប្រភពទឹកពីទន្លេមេគង្គ និងទឹកភ្លៀង ហើយអាចស្តុកទឹកបានប្រមាណ៩លានម៉ែត្រគូប។ ទំនប់នេះមានប្រវែង ១ ៩៤៣ ម៉ែត្រ មានប្រឡាយមេប្រវែង ១ ៧៨៦ម៉ែត្រ និងប្រឡាយរងមានប្រវែង ៣៦០២ម៉ែត្រ។ មានសំណង់ទ្វារទឹកចំនួន ២កន្លែង និងសំណង់ចែកចាយទឹកចំនួន ១០កន្លែង ដែលអាចស្រោចស្រព ផ្ទៃដីស្រែប្រាំងប្រមាណ ១ ១១៦ហិកតា៕ ដោយ៖ ឆាយ ម៉ុត