ព្រឹកនេះ សម្ដេចធិបតី ហ៊ុន ម៉ាណែត នឹងអញ្ជើញជាអធិបតីក្នុងពិធីចែកពូជស្រូវ និងកញ្ចប់ស្បៀងនៅខេត្តបាត់ដំបង

AKP បាត់ដំបង ថ្ងៃទី៣០ ខែតុលា ឆ្នាំ២០២៦–សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា នាព្រឹកថ្ងៃទី៣០ ខែតុលា ឆ្នាំ២០២៦នេះ នឹងអញ្ជើញជាអធិបតីក្នុងពិធីចែកពូជស្រូវ និងកញ្ចប់ស្បៀងនៅខេត្តបាត់ដំបងដែលពិធីនេះប្រារព្ធនៅអាកាសយានដ្ឋានខេត្តបាត់ដំបង។

វត្តមានរបស់សម្តេចធិបតីនាព្រឹកនេះ ពិតជាបាននាំមកនូវ មហាកិត្តិយស និងជាការលើកទឹកចិត្តដល់រដ្ឋបាលខេត្តបាត់ដំបង ដែលជាការបញ្ជាក់ឱ្យឃើញពីការ យកចិត្តទុកដាក់ខ្ពស់ពីសំណាក់រាជរដ្ឋាភិបាល លើបញ្ហាជីវភាពរបស់បងប្អូនប្រជាពលរដ្ឋ ដែលកំពុងតែ មានក្តីកង្វល់ចំពោះបញ្ហាគ្រោះមហន្តរាយដោយទឹកជំនន់នាពេលថ្មីៗនេះ។

សូមជម្រាបជូនថា ជំនន់ទឹកភ្លៀងបណ្តាលឱ្យផលប៉ះពាល់ដំណាំស្រូវសរុប ១២៣.០៧២ហិកតា ក្នុងនោះមានស្រូវទុំ ១៥.៦៣៨ហិកតា, ខូចខាតដាំណាំស្រូវ ៧៤.៣៨៨ហិកតា, ដំណាំសាកវប្បកម្ម និងឧស្សាហកម្មផល ប៉ះពាល់សរុប ១៦.៣៧៤ហិកតា, ខូចខាត ៨.៦៨០ហិកតា គ្រួសារដែលប៉ះពាល់ សរុប ៥៨.១០៣គ្រួសារ ខូចខាត ៣៥.៧០៤គ្រួសារ៕

ដោយ៖ គង់ សិរីរ័ត្ន