សាខាកាកបាទក្រហមកម្ពុជាខេត្តកណ្តាល នាំអំណោយសម្តេចកិត្តិព្រឹទ្ធបណ្ឌិតជូនគ្រួសារពិការក្រីក្រ នៅស្រុកស្អាង

AKP កណ្តាល ថ្ងៃទី៣០ ខែតុលា ឆ្នាំ២០២៦--លោកស្រី រិន ច័ន្ទម៉ារីណា នាយិកាសាខាកាកបាទក្រហមកម្ពុជាខេត្តកណ្តាល និងសហការី ដោយមានការចូលរួមពីប្រតិភូអនុសាខាកាកបាទក្រហមកម្ពុជាស្រុកស្អាង នារសៀលថ្ងៃទី២៩ ខែតុលា ឆ្នាំ២០២៦ បានចុះសួរសុខទុក្ខ និងនាំយកអំណោយមនុស្សធម៌របស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ជូនដល់គ្រួសារលោក កូយ ប៊ុណ្ណា អាយុ ៤៤ឆ្នាំ ជាពោះម៉ាយពិការជើង មានជីវភាពខ្វះខាត និងមានបន្ទុកចិញ្ចឹមកូនចំនួន ៣នាក់ ដែលរស់នៅ ភូមិកូនជ្រែ ឃុំព្រែកអំបិល ស្រុកស្អាង ខេត្តកណ្តាល ។

ក្នុងឱកាសនោះ លោកស្រី រិន ច័ន្ទម៉ារីណា បាននាំនូវការផ្តាំផ្ញើសាកសួរសុខទុក្ខ និងការយកចិត្តទុកដាក់ពីសំណាក់ឯកឧត្តម គួច ចំរើន ប្រធានគណៈកម្មាធិការសាខា ជាពិសេសពីសំណាក់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ដែលតែងតែគិតគូរពីសុខទុក្ខ និងជីវភាពរស់នៅរបស់ប្រជាពលរដ្ឋ ជាពិសេសអ្នកដែលកំពុងជួបការលំបាក និងងាយរងគ្រោះ។ កាកបាទក្រហមកម្ពុជា តែងតែណែនាំដល់មន្ត្រីគ្រប់លំដាប់ថ្នាក់ និងអ្នកពាក់ព័ន្ធនៅមូលដ្ឋាន ឱ្យយកចិត្តទុកដាក់ពិនិត្យមើលស្ថានភាពជីវភាពរបស់ប្រជាពលរដ្ឋ ព្រមទាំងចុះសួរសុខទុក្ខ និងផ្តល់ជំនួយមនុស្សធម៌ដល់ជនងាយរងគ្រោះ និងអ្នករងគ្រោះដោយគ្រោះមហន្តរាយផ្សេងៗ ឱ្យបានទាន់ពេលវេលា ស្របតាមគោលការណ៍មនុស្សធម៌ ដោយមិនប្រកាន់ពូជសាសន៍ សាសនា និន្នាការនយោបាយ ឬស្ថានភាពសង្គមឡើយ។

អំណោយមនុស្សធម៌ដែលសាខាកាកបាទក្រហមកម្ពុជាខេត្តកណ្តាល បានផ្តល់ជូន រួមមាន ឧបករណ៍បំពង់ខ្យល់សម្រាប់លាង និងសប់កង់យានយន្តចំនួន ១គ្រឿង ដើម្បីទុកប្រកបរបររកស៊ីចិញ្ចឹមជីវិតប្រចាំថ្ងៃ ព្រមទាំងគ្រឿងឧបភោគបរិភោគបន្ថែមមួយចំនួនរួមមាន អង្ករ២៥ គីឡូក្រាម មី ១កេស ត្រីខ ១យួរ ទឹកត្រី ១យួរ ទឹកស៊ីអ៊ីវ ១យួរ ទឹកសុទ្ធ ១កេស ៕

ដោយ៖ ណយ នឿន (ប្រភព៖រដ្ឋបាលខេត្តកណ្តាល)